பல்லவர் காலத்தில் காஞ்சியில் வாழ்ந்த சிறந்த வடமொழிக் கவிகளில் ஒருவர் தண்டி.

இவர் அவந்தி சுந்தரி கதா என்ற வடமொழி காவியத்தை எழுதினார்.

அதில் மாமல்லபுரத்தைப் பற்றிய ஒரு முக்கிய குறிப்பு வருகிறது.

***

கடற்கரைக் கோயிலில் உள்ள பெருமாளே ஆழ்வார்களால் பாடப்பட்டவர் என்பதே பல ஆய்வுகள் சொல்லும் உண்மை ஆகும்.

அப்பெருமாளில் கைகளில் ஒன்று மணிக்கட்டுப் பகுதியில் உடைந்து போனது.

பல்லவ மன்னன் மிகவும் கவலைக்குள் ஆயினான்.

சேதமான விக்ரஹத்தைப் பூஜிப்பது என்பது சாஸ்த்ர மரபில் இல்லை.காரணம் சேதமான பொருளில் ஆவாஹனம் செய்த இறைசக்தி கலைகிறது.

ஆனால் பல்லவனுக்கு இச்சிலையைத் திருத்திச் செப்பனிட மனம் துடித்தது.

லலிதாயன் என்ற இளைய சிற்பி இக்காரியத்தை மேற்கொண்டான்.

அவன் தன் சிற்ப சாஸ்த்ர ஞானத்தால் உடைந்த கல் சிற்பத்தை இணைக்கும் முறையைக் கண்டுபிடித்தான் எனலாம்.

பெருமாளின் திருக்கரத்தைச் செப்பனிட்ட பின் அவன் பல்லவனையும் தண்டியையும் மாமல்லபுரத்திற்கு வந்து அதைக் காணச் சொன்னான்.

தண்டி அத்தருணத்தில் மல்லைக்குச் சென்று பல்லவனின் தங்கும் மாளிகையில் தங்கி, பெருமாளின் அழகையும் தரிசித்துள்ளார்.

அப்போது லலிதாயனைப் பாராட்ட வார்த்தைகள் இல்லை என்று கூறி தாமரை மலர் ஒன்றை அவன் கைகளில் அளித்தார்.

***

இன்றும் கடற்கரைக் கோயில் பெருமாள் இடது பக்கத் தூக்கிய கரம் சிதைந்துள்ளது.இதுவே அவந்திசுந்தரியில் குறிப்பிடப்பட்ட செப்பனிடப்பட்ட கரம் எனலாம்.

கேவாத பெருந்தச்சன், சாதமுக்கியன், குணமல்லன், திருவொற்றியூர் ஆபாஜன் ஆகியோர் தலையாய சிற்பிகளாக இருந்துள்ளனர்.

ராஜராஜன் பல்லவரின் கோயில்கட்டிடக் கலையை நன்கு ஆழ்ந்து ஆராய்ந்து இருக்கிறான்.அவன் சிற்பக்கலைஞர்களை ஆராய்ச்சியில் ஈடுபடுத்தினான்.அதன் பிறகே தஞ்சையில் பெரிய கோயிலை எழுப்பினான்.தஞ்சைப் பெரிய கோயிலுக்கு முன்னோடி மாமல்லபுரம் எனலாம், தவறில்லை!

Sakthi Foundation

மஹாபலிபுரம் - பெயர்க்காரணம் சரியா?

நீர்ப்பேர், மல்லை, கடல் மல்லை, மாமல்லை, மாமல்லபுரம், மல்ல பட்டிணம், மாமல்ல நகரம், மாவேலிபுரம், ஜனநாதபுரம், என்றெல்லாம் அழைக்கப்படும் மாமல்லபுரம் மஹாபலிபுரம் என்று கல்வெட்டுகளில் குறிப்பிடப்படவே இல்லை.

ஆனால் இன்று அனேக மக்களுக்கும் ”மஹாபலிபுரம்” என்றே பெயர் அறியப்படும் தன்மை உள்ளது.

இதற்கு விளக்கம் கேட்டனர் என் மாணவர்கள்.

மஹாபலி மன்னன் சர்வ லோகத்தையும் தனதாக்கிக் கொள்ள வேண்டும் என்ற பேராசையுடன் யாகம் செய்தான்.ஆனால் அவனது ஆணவத்தை அகற்றி வாமனனாக வந்த மஹாவிஷ்ணு அவனைத் திருத்தினார்.

வாமனன் செய்த திருவிக்ரம அவதாரம் வராஹ குகையில் வெகு அழகாகக் காட்டப் படுகிறது.

மஹாபலி என்பது ”மிகப் பெரிய பலி - த்யாகம்” ஆகும்.

அதை அவன் செய்தே இறையருளால் பாதாள உலகின் அரசன் ஆனான்.

அரசர்கள் பலர் சதா மண் ஆசையுடன் பொன்-பொருள்-பெண் ஆசையால் போர்கள் செய்த காலத்தில் பல்லவ அரசர்கள் ஆன்மீக நெறியில் மனதைச் செலுத்தி அவற்றில் இருந்து விடுபட்டு மக்களின் அமைதியான வாழ்வுக்கும், உயர்வுக்கும் வழி செய்தனர்.

மனதை போகத்தில் ஈடுபடுத்தாமல் கோயில் கட்டிடக் கலை, இசை, ஓவியம், ஆன்மீகம் சார்ந்த கலைகளில் ஈடுபட்டனர்.

குறிப்பாக முதலாம் நரசிம்ம வர்ம பல்லவன் அப்பர், ஞான சம்பந்தர், ஆதி சங்கரர், முதல் ஆழ்வார்கள் ஆகியோரின் வழிகாட்டலில் மல்லைக் கோயில் கலையில் தன்னை முழுவதும் ஈடுபடுத்தினான்.

அவன் மட்டும் அல்லாது பின் வந்த பல்லவரும், சிற்பிகளும் சமூஹக் கலைப்பணியாய் ஆன்மீகப் பணியாய் இவற்றைச் செய்தனர்.

இவை எல்லாம் மிக உயர்ந்த பலியே!

போகத்தை விடுத்த பலி!

எனவே இவ்வூர் ”மஹாபலிபுரம்” தான்!

Sakthi Foundation

மகேந்திர வர்ம பல்லவன் [கி.பி 6]

பல்லவ மன்னர்களுள் சிலர் மிகவும் புகழ் பெற்றவர்கள்.அவர்களுள் ஒருவர் மஹாபலிபுரத்துச் சிற்பங்களுக்கும், குடைவரைக் கோயில் கட்டிடக் கலைக்கும் வித்திட்ட மகேந்திர வர்மன் ஆவார்.அவரது வரலாற்றை மக்களுக்கும், மாணாக்கருக்கும் எளிமையாக இப்பகுதி எடுத்துக் கூறுகிறது.

மகேந்திரனின் தந்தை...

இவரது தந்தை சிம்ம விஷ்ணு பல்லவன்.

இவர் சோழ தேசம், களபரர், மாளவம், சேர தேசம், பாண்டிய தேசம், இலங்கை ஆகிய பகுதிகளை வெற்றி கொண்டு தன் பல்லவ சாம்ராஜ்ய ஆட்சிக்குக் கீழ் கொண்டு வந்தான்.ஆந்திராவின் க்ருஷ்ணா ஆற்றங்கரை முதல் தமிழகத்தின் புதுக்கோட்டை மாவட்டம் வரை இவன் பல்லவ தேசத்தை விரிவு செய்தான்.

இளவயது யுவராஜன்...

இவன் மகன் மகேந்திரன் இளைய வயதில் அதிகம் ஆந்திராவிலேயே வாழ்ந்தான்.

அப்போது குண்டூர் மாவட்டம் சேஜர்லா என்ற ஊரில் ஒரு சிவன் கோயிலைப் பழுது பார்த்தான் என்று கல்வெட்டு கூறும்.அக்கோயில் இன்றும் உள்ளது.அதன் பெயர் கபோதேஸ்வரர் கோயில். இதன் மூலம் மிகச்சிறிய வயதிலேயே கட்டிடக் கலையிலும் சமயத்திலும் அவனுக்கு இருந்த ஆர்வம் தெரிகிறது.

தன் அப்பாவின் மரணத்துக்குப் பின் மகேந்திர வர்மன் காஞ்சிபுரத்துக்கே வந்து முடிசூடி மன்னன் ஆனான்.கி.பி 600 - 630 வரை அவன் மன்னனாக இருந்துள்ளான்.இவன் மகன் தான் மஹாபலிபுரத்தில் பல வேலைகளைச் செய்த முதலாம் நரசிம்ம வர்ம பல்லவன்.

தமிழ், வடமொழி, தெலுங்கு, பாலி, ப்ராக்ருதம் ஆகிய மொழிகளை மகேந்திரன் கற்றான்.

வடமொழியில் இலக்கியங்கள், இசைப்பாடல்கள் மற்றும் நாடகங்கள் எழுதும் அளவுக்கு மொழித்திறன் கொண்டு விளங்கினான்.

”மத்த விலாஸம்” என்பது இம்மன்னன் எழுதிய மிகவும் நகைச்சுவை கலந்த நாடகம் ஆகும்.இதன் மூலம் அவனுக்குள் இருக்கும் நகைச்சுவை உணர்வு புரிகிறது.மேலும் சமூஹத்தில் உள்ள குற்றம் குறைகளைச் சுட்டிக்காட்டி விமர்சிக்கிறான்.அதன் மூலம் இவன் மக்களின் மீது கொண்ட கவனமும் தெரிகிறது.

புள்ளலூர்ப் போர்

அமைதியை விரும்பும் மன்னனுக்கு சாளுக்கிய மன்னன் இரண்டாம் புலிகேசி மூலம் ஆபத்து வந்தது.கி.பி 610ல் அவன் ஆந்திராவின் பல பகுதிகளைக் கைக்கொண்டான், காஞ்சிபுரத்தைத் தாக்கினான்.அப்போது மகேந்திர வர்மன் புலிகேசியைப் புள்ளலூர் என்ற ஊரில் போரிட்டுத் துரத்தினான்.அவ்வூர் இன்றும் காஞ்சிபுரத்துக்கு அருகில் உள்ளது.ஆனால் புலிகேசி சும்மா இருக்கவில்லை, அடிக்கடி தொந்தரவு செய்தான்.

கல்வெட்டு வர்ணிக்கும் போர்...

”பல்லவ வீரர்கள் என்ற குளிர்பனியை சாளுக்கியப் புலிகேசி என்ற சூரியன் ஒன்றும் இல்லாமல் செய்தது.

காற்றில் தூசிகள் பறப்பதைப் போல் வெகு எளிதில் புலிகேசி காஞ்சிபுரத்துக்குள் நுழைந்தான்.ஆனால் இந்திராம் மகேந்திரனைப் போல வீரம் கொண்ட மகேந்திர பல்லவன் அவனை வெற்றி கொண்டு விட்டான்”

மகனுக்கு ஏற்ற வேலை...

தக்க வயது வந்த தன் மகன் முதலாம் நரசிம்ம வர்ம பல்லவனுக்கு இளவரசு பட்டம் சூட்டி மாமல்லபுரத்தில் இருந்து கடல் வாணிபத்தைக் கண்காணிக்க வைத்தான் மகேந்திர வர்மன்.

அதுவரை மாமல்லபுரம் ”நீர்ப்பெயற்று” என்றே வழங்கி வந்தது.நரசிம்ம வர்மன் சிறந்த மல்லனாகப் பட்டம் பெற்றதைக் கொண்டாடும் வகையில் மாமல்லபுரம் என்று பெயரிட்டான் மகேந்திர வர்மன்.தன் மகனின் வளர்ச்சியில் மிகவும் கவனம் கொண்டு இருந்தான் மகேந்திரன்.

பல ஊர்களை அமைத்த மன்னன்...

காஞ்சிக்கு அருகில் உள்ளது மாமண்டூர்.

அவ்வூரில் மகேந்திரன் மழை நீரைத் தேக்கி வைக்கும் பெரிய ஏரி ஒன்றை உண்டாக்கினான்.அது இன்றும் உள்ளது.அதற்குச் சித்ரமேகத் தடாகம் என்றும் அழகிய பெயரை வைத்தான்.

மாமண்டூருக்கு அருகில் மகேந்திர மங்கலம் என்ற ஊரை உண்டாக்கினான்.

சென்னைக்கு அருகில் வாலாஜா பேட்டைக்கு அருகே மகேந்திரவாடி என்ற ஊரையும் அவ்வூரில் ஒரு பெரிய ஏரியையும் உருவாக்கினான்.

சோழ தேசத்தில் கடற்கரைப் பகுதியில் மகேந்திரப்பள்ளி என்ற அழகிய சிவன் கோவிலை உருவாக்கினான்.அதை ஞானசம்பந்தர் தேவாரத்தில் பாடியுள்ளார்.

சிறப்புப் பெயர்கள்:

மகேந்திர விக்ரம வர்மன், மகேந்திர போத்தரசன், பகாப்பிடுகு, லலிதாங்குரன், குணபரன்,மத்தவிலாஸன், அவனிபாஜனன், சத்யசந்தன், புருஷோத்தமன், சத்ருமல்லன், சங்கீர்ண ஜாதி, சித்ரகாரப்புலி, சேதகாரி, விசித்ரசித்தன், அலுப்த காமன், கலகப்ரியன், அபிமுகன், மகா மேகன், நரேந்திரன்.

கலைஞர் மகேந்திரன்

மகேந்திர பல்லவன் இசை, ஓவியம், சிற்பம் ஆகிய நுண்கலைகளில் ஆர்வம் கொண்டு இருந்தான்.

மத்தவிலாஸம் - நாடகம், தக்ஷிண சித்ராக்யம் - ஓவிய நூல், கந்தர்வ சாஸ்த்ரம் - இசை நூல் ஆகியன மகேந்திரன் எழுதிய மிக முக்கிய நுண்கலை நூல்கள்.

தமிழகத்தைக் கோயில்களுக்குப் பெயர் சிறக்க வைத்த மன்னன்...

குறிப்பாக இவன் கட்டிடக்கலையில் மாற்றங்கள் கொண்டு வந்தான்.தரமான செங்கற்கள் கொண்ட கோயில்களையும் எழுப்பினான்.அவற்றுக்கு ”மண் தளி” என்று பெயர். [தளி - சிவன் இருக்கும் கர்ப்பக்ருஹம்]

இவன் காலம் வரை, தமிழகத்தில் பல கோயில்கள் மண், செங்கல், கலவை, மரத்தால் உருவாக்கப்பட்டன.அவை அடிக்கடி பழுதுபட்டன.

வடதேசத்தின் அஜந்தா எல்லோரா குகைக்குடைவரைக் கோயில்களை சமண முனிவர்கள், பெளத்த முனிவர்கள் மூலம் கேள்விப்பட்டு அதை அறியத் தன் தேசத்து அறிஞர்களை, சிற்பிகளை, ஓவியர்களை, பொறியாளர்களை அனுப்பினான் என்று தெரிகிறது.அவர்கள் அவற்றின் நுட்பங்களை அறிந்து வந்து தமிழகத்தில் இயற்கை இடம் கொடுத்த மலைகளில், பாறைகளில் குடைவரைக் கோயில்களை உண்டாக்கினர்.சுமார் ஐம்பது குடைவரைக் கோயில்கள் தமிழகத்தில் இவன் காலத்தில் உருவாயின.

[மாமல்லபுரம், வல்லம், திருச்சி மலைக்கோட்டை, மண்டகப்பட்டு, மாமண்டூர், தளவானூர், மகேந்திரவாடி, மேலைச்சேரி, சித்தன்ன வாசல், சீயமங்கலம், குரங்கணில் முட்டம், சிங்கவரம், திருக்கழுக்குன்றம், திருக்கோகர்ணம் ஆகிய ஊர்களில் இன்றும் அழியாமல் மகேந்திர வர்மன் அமைத்த குடைவரைக் கோயில்கள் உள]

சமயம்

இவன் காலத்தில் தான் காஞ்சிபுரம் கல்வியில் சிறந்ததாக விளங்கியது.அனைத்து மதங்களையும் கற்றுக் கொடுக்கும் மடங்கள் நிறைந்து இருந்தன.புத்த மதம் மாமல்லபுரம் வழியே கிழக்கு நாடுகளுக்கும் பரவியது.புத்தம், சமணம், சைவ, வைஷ்ணவம் மற்றும் சக்தி வழிபாடு அதிகமாக இருந்தது.காஞ்சிபுரத்தையே கோயில்களின் நகரமாக மாற்ற ஆரம்பித்தான் மகேந்திரன் எனலாம்.

முதலில் சமணனாக இருந்த மகேந்திரன் அப்பர் மூலம் சைவனாக மாறினான்.பல சிவன் கோயில்களை எழுப்பினான்.அப்பர், ஞானசம்பந்தர் ஆகியோர் இம்மன்னன் காலத்தில் காஞ்சியில் வாழ்ந்தனர்.அப்பர் மடம் நடத்தினார்.

குடைவரைக் கோயில்களில் உள்ள சுவையான தகவல்கள்:

Rockfort city ஆன திருச்சி மலைக்கோட்டைக் கல்வெட்டு என்ன கூறுகிறது?

”சமண சமயத்தை விட்டு சைவ சமயத்துக்கு மாறிய மகேந்திரன் சோழ தேசத்துக்குக் கிரீடம் போல் விளங்கும் மலைக்கோட்டை மேல், குகைக்குள் சிவனுக்கு ஆலயம் செய்தான்.

அழகிய காவிரியைப் பார்த்து, கங்கையைத் தலையில் சூடிய சிவன் எங்கே காவிரியையும் தலையில் சூடிடுவாரோ என்று சந்தேஹித்து, பார்வதி இம்மலையில் தங்கியுள்ளாள்.

மகேந்திர பல்லவன் சிவனுடன் அழியாப் புகழ் கொள்ள தன் அழகிய உருவத்தையும் குகைக்குள் செதுக்கியுள்ளான்.

தன் மனதில் சதா சிவனை பஜிக்கும் மகேந்திரன் மிகவும் பக்தியுடன் இந்த குகைக்கோயிலை அமைத்துள்ளான்.

தரையில் நின்று பார்த்தால் காவிரியின் அழகும் பெருமையும் விளங்காது என்று சிவன் சொல்ல, அவருக்கு மலை மீது குகையில் கோயில் வைத்தானோ?

இதற்கு ”லலிதாங்குர பல்லவேஸ்வர க்ருஹம்” என்று பெயர் விளங்குகிறது”

விழுப்புரத்துக்கு அருகில் உள்ள மண்டகப்பட்டுக் கல்வெட்டு தரும் சில உண்மைகள்:

”செங்கல், மரம், உலோகம், சுண்ணாம்பு இல்லாமலும் ப்ரம்ம ஈஸ்வர விஷ்ணுகளுக்கு விசித்ரசித்தனால் அமைக்கப்பட்ட கோயில்”

தளவானூர்க் கல்வெட்டு [செஞ்சிக்கு அருகில் உள்ள கிராமம்]

”தன் படை வீரர்களால் பகைவர்களை அடக்கிய சத்ருமல்லன் சிவனுக்கு நன்றியாக அமைத்த சத்ருமல்லேஸ்வரம்”

வாலாபேட்டைக்கு அருகில் உள்ள மகேந்திரவாடிக் கல்வெட்டு:

”மகேந்திரவாடியில் மகேந்திர தடாகம் அருகில் உலக மக்கள் கண்டு மகிழும்படி அழகு மிகு முராரியான விஷ்ணுவுக்கு மகேந்திர விஷ்ணு க்ருஹத்தை மகேந்திர பல்லவன் அமைத்தான்”

மாமல்லபுரத்தில் மகேந்திரன்

மாமல்லபுரத்தை உலகம் போற்றும் சிற்பக் கருவூலமாக மாற்றிய பெருமை கொண்டவன் மகேந்திரன்.அவன் எழுப்பிய மூன்று கோயில் அமைப்புகள் மாமல்லபுரத்தில் உள்ளன.

கோடிக்கால் துர்கை மண்டபம், சகர ராஜ சிற்பம் [பகீரதன் தவம்], தர்மராஜா ரதக்கோயில் எனப்படும் மும்மூர்த்தி ரதம் [பாண்டவர் ரதக்கோயில்]

முற்காலத்தில் தமிழகத்தை ஆண்டு, கோயில் கட்டிடக் கலைக்கும், ஓவியத்துக்கும் புதிய பரிணாமத்தைக் கொடுத்த மகேந்த பல்லவன் புகழ் தமிழகத்துக் கோயில்கள் உள்ள வரை இருக்கும்.வீணாக மண்ணாசை கொண்டு போரில் தன் வெறிச் செலுத்தாமல் இயற்கை அளித்த மலைக்குகைகளில் இறைப்பணி செய்து கலைக்கும், சமயத்துக்கும் உறுதுணை செய்த இம்மன்னன் இல்லை என்றால் தமிழகத்தில் உயர்ந்த கோயில் கலை இல்லை!

Sakthi Foundation

Madurai’s Talk....

”என் இனிய தமிழ் மக்களே!

நான் தான் மதுரை பேசுகிறேன்!

என்னுடைய மண்ணில் தான் மூன்றாம் தமிழ்ச் சங்கம் இருந்தது.அதில் பல அழகிய முக்கியமான இலக்கண இலக்கியங்களைப் புலவர்கள் எழுதினார்கள்.

என்னைப் பற்றி நினைத்தாலே மீனாக்ஷி அம்மன் கோயில் தான் உங்களுக்கு நியாபகம் வரும்.இக்கோயில் எனது இதயப்பகுதியில் அமைந்துள்ளது.சுமார் 2500 ஆண்டுகளாக இக்கோயில் உள்ளது.பல கல்வெட்டுகளும் அதில் உள்ளன.

என்னைப் பாண்டிய மன்னர்கள் முற்காலத்தில் ஆண்டனர்.பின்னர் முகமதியரும் நாயக்க மன்னர்களும் ஆண்டனர்.திருமலை நாயக்க மன்னன் என் செல்லப் பிள்ளை!

அவர் தான் இன்று காணும் கோயிலை, மஹாலைக் கட்டி எனக்கு உலகப் புகழ் சேர்த்தார்.

முருகனின் முதல் மற்றும் ஆறாம் படை வீடுகள் என்னிடத்தில் தான் உள்ளன.

சித்திரை மாதத்தில் வரும் சித்திரைத் திருவிழா பெரிய விழா ஆகும்.மீனாட்சி கல்யாணமும், தேரும், அழகர் ஆற்றில் இறங்கும் விழாவும் உலகப் புகழ் பெற்றவை.

சிவனின் திருவிளையாடல்கள் என் மீது தானே நிகழ்ந்தன?

பெண்ணுக்கு முன் உரிமை தரும் மீனாட்சி வழிபாடு என் பெருமை அல்லவா?

உலகில் மிகப் பெரிய நவராத்ரி கொலு என் கோயிலில் தான் நிகழ்கிறது.

வண்டியூர்த் தெப்பக்குளம் மிகப் பெரிய குளம் ஆகும்.

என்னைத் தூங்கா நரகம் என்று அழைக்கிறீர்கள்.காரணம் விடிய விடிய மக்கள் பயணம் செய்வர், வியாபாரம் நடக்கும்.

நடு இரவில் கூட சுடச் சுட இட்லி - தோசை கிடைக்கும்.

”என் இடத்தில் இருக்கும் பழமையான காமராசர் பல்கலைக் கழகம் மிகச் சிறந்தது.அங்கு மேலை-கீழை நாட்டில் இருந்து பல மாணவர்கள் வந்து படிக்கிறார்கள்.

என் மண்ணின் மீது விளையும் மல்லிகை மலர்கள் எனக்கு மிகப் பெருமையைச் சேர்க்கின்றன.என் பெயரிலேயே மல்லிகை மணக்கும்.மல்லிகை தினமும் சிங்கப்பூருக்கு ஏற்றுமதி செய்கிறார்கள்.

எனது அடுத்த ப்ரபலான பொருள் சுங்குடியும், செளராஷ்ட்ரா புடவைகளும் ஆகும்.

ஒத்தக்கடை ஆனைமலையில் பல முக்கியமான பழைய கல்வெட்டுகளைக் கண்டு பிடித்துள்ளனர்.தினமும் அவற்றைக் காணப் பலர் வருவர்.ஆனைமலையில் அழகிய பழைய நரசிம்மர் குகைக் கோயிலையும் பாருங்கள்!

வருடத்தில் விஜயதசமி அன்று 108 வீணைகள் வாசித்து இசை வழிபாட்டைச் செய்வது உலகில் வேறெங்கும் இல்லை.

அழகிய வைகை ஆறு வெயில் காலத்தில் நீர் வற்றியும், மழைக்காலத்தில் வெள்ளப்பெருக்குடனும் ஓடும்.வைகையைக் காணாமல் யாரும் செல்வதில்லை.இறைவனே என் மீது பிட்டுக்கு மண் சுமந்தார் அல்லவா?

என்னிடத்தில் இத்தனை அருமையான விஷயங்கள் இருப்பது எனக்கு மிகவும் மகிழ்ச்சி.அதை ஏற்படுத்தியவர்கள் நீங்கள் தானே!?”

வைஷ்ணவி - Grade 8th, 8.11.2014

''மதுரை சண்முகவடிவு சுப்புலக்ஷ்மி என் மீது பிறந்து வளர்ந்தவர்.அவர் கர்னாடக சங்கீதத்தில் மிகப் புலமை ஆனவர். அவர் என் மடியில் பிறக்க நான் தவம் செய்தேன். மதுரை சோமு, மணி ஐயர் மற்றும் சேஷகோபாலன் ஆகியோரும் என் மக்களே!இவர்களும் கர்னாட இசையின் ஜாம்பவான்கள் ஆவர்!

என் மகன் இளையராஜா மிகப் பெரிய இசை அமைப்பாளர் ஆவார்.அவர் உலகின் சிறந்த இசை வல்லுனர்களில் ஒருவர்.

திரைப்பட இயக்குனர் பாரதிராஜாவும் என் மகனே! இவர் என் மண்ணின் கலாச்சாராத்தை வெளியிட்டார்.

தமிழ்க் கவிஞர், பத்மபூஷண் வைரமுத்து என் மடியில் பிறந்த முத்து தான்.

ஆனால் இக்காலத்தில் குறிப்பாகத் திரைப்படங்களில் என்னைக் காட்டினாலே அடிதடி, ரெளடியிஸம், குண்டாயிஸம், வன்முறை என்றே சித்தரிக்கிறார்கள்.அது ஏன்?

எனக்கு எவ்வளவோ புகழ் இருக்கிறதே?! ஆனால் இக்காலத்தில் சிலர் அதைப் பயன்படுததமல், ரசிக்காமல் என்னைத் தவறாக ஏன் சித்தரிக்கிறார்கள்?''

Sakthi Fundation

Uni5 education – Vinayagar worship in Tamil Nadu

7th century A.D

Thiru chengaatang kudi is a very fertile village near Mayavaram.

Paranjothy who was just 12 years old left the village with his mother's blessings towards Kanchipuram - the city of great wisdom.

He was fatherless and his mother wanted him to be a great scholar in Tamil and Shivism.

He was supposed to join under the great saint singer Appar's mut.

His father and ancestors were great brave elephant warriors under Chola Empire.

They made many to die and them self and died.

Paranjothy's mother wanted a transformation of peace and selftualism in the family.

But Paranjothy's previous birth actions [karmas] made him to save the Pallava prince from a wild elephant and became his close friend.

He learned war lessons and martial arts and appointed as army general under Pallava dynasty.

Pallavas faced a horrible war with Pulikesi 2 in Vathabi city of Gujarath. The war took place for 1 year.

Paranjothy saw a different looking God at the fort gate of Vathabi city and came to know that the God will remove all obstacles.

He also prayed to him that he will take him and install in a fresh temple in Tamil Nadu if he wins the war.

Pallavas defeated the northern empire and by that time tragedy and lessons gave by mother transformed Paranjothy's mind into peace, spiritual and he want to have a change.

He resigned his army general post and just took the idol of Vadhapi gate and left to his village where he erected a bifg shrine for Shiva along with this new looking God. He named it as ''Ganapateeshwaram''

This idol of Ganesa is the very first Ganesa in Tamil Nadu brought by Paranjothy in 7th century A.D.

Today also we can see the shrine in the village which is being praised by Appar and Sambandhar.

Later Muthu Samy Deekshidar sang the famous ''Vadhaapi Ganapathim baje''

When Marati kings ruled Tamil country from Tanjore, Vainayagar worship has been accepted by every one and today we can see plenty of Ganapathy in this state. 

Sakthi foundation

பல்லவ நாடு

தமிழகத்தின் வடக்குப் பகுதியைப் பழங்காலத்தில் தொண்டை நாடு என்று மக்கள் அழைத்தனர்.அப்பகுதியைத் ”தொண்டை மான்” என்ற சிறப்புப் பெயர் கொண்ட பல மன்னர்கள் ஆட்சி செய்தனர்.அவர்கள் காஞ்சிபுரத்தைத் தலைநகரமாகக் கொண்டு ஆண்டனர்.

சென்னை, திருவள்ளூர், விழுப்புரம், திருவண்ணாமலை ஆகிய மாவட்டப் பகுதிகள் அக்காலத்துத் தொண்டை தேசம் ஆகும். காஞ்சி மரங்கள் நிறைந்த வனப்பகுதியைத் திருத்தி ஊரை அமைத்ததால் ’காஞ்சி’ என்ற பெயர் ஏற்பட்டது.

இவ்வூரைக் ‘’கச்சி’’ என்று மிகப் பழைய தமிழ் இலக்கியங்கள் அழைக்கும்.

தொண்டை மன்னர்களை வீழ்த்தி சில வேறு வடதேசத்து மன்னர்கள் இம்மண்ணைக் கைக் கொண்டதுடன் தமிழகத்தின் சோழ, பாண்டிய தேசங்களை பிடித்துக் கொண்டனர்.

சுமார் கி.பி 5ஆம் நூற்றாண்டில் வடகிழக்குப் பகுதியில் இருந்து வந்த பல்லவ அரசன் இப்பகுதியைக் கைக்கொண்டான். சோழருக்கும் பாண்டியருக்கு அவரவர் நாட்டைத் திருப்பி அளித்தான்.

அப்போது காஞ்சிபுரத்தைத் தலைநகராகக் கொண்டு பல்லவ மன்னர்கள் பலர் பல்லவ தேசத்தை ஆண்டனர்.கி.பி 5 - 9 நூற்றாண்டுகள் வரைப் பல்லவர்கள் வடதமிழகத்தை ஆட்சி செய்தனர்.

 அவர்கள் மாமல்லபுரத்தைத் துறைமுகம் ஆக்கிக் கொண்டனர்.அதன் மூலம் க்ரீஸ், ஈஜிப்ட், சைனா, அரேபியா, இலங்கை, ஜாவா, சுமத்ரா, இந்தோனேஷியா போன்ற நாடுகளுடன் கடல் வாணிபம் செய்து பல்லவ தேசத்தைப் பணக்கார தேசமாக மாற்றினர்.

பல்லவ மன்னர்கள் மக்களை நன்கு பாதுகாத்தனர்.தமிழ், சம்ஸ்ருதம் ஆகிய இரண்டு மொழிகளுக்கு முக்யத்துவம் தந்தனர்.சில பல்லவ மன்னர்கள் சம்ஸ்க்ருதத்தில் நாடகங்கள் கூட எழுதி உள்ளனர்.

தங்களைப் பற்றி, தங்கள் பணிகளைப் பற்றி, முக்கியமான நாட்டு நடப்புகள் பற்றிக் கோயில் சுவர்களில் கல்வெட்டு மூலம் பதிவுகள் செய்தனர்.செப்புத் தகடுகளில் எழுதும் முறையையும் கையாண்டனர்.

பல்லவ மன்னர்கள் ஆண்ட காலத்தில் சைவம், வைஷ்ணவம், சாக்தம், சமணம், பெளத்தம் ஆகிய சமயங்கள் அதிகமாக மக்களால் பின்பற்றப் பட்டன.மத வேறுபாடு இல்லாமல் மன்னர்கள் வாழ்ந்தனர்.

மகேந்திர பல்லவன்

கி.பி ஏழாம் நூற்றாண்டில் பல்லவ தேசத்தை ஆண்ட மகேந்திர பல்லவன் மிகவும் நல்லவன்.அவன் மஹாராஷ்ட்ராவில் உள்ள அஜந்தா, எல்லோரா குகைக் கோயில்கள், அதில் உள்ள அழகிய சிலைகள், ஓவியங்கள் பற்றிக் கேள்விப் பட்டு அவற்றைப் போலவே தன் நாட்டிலும் செய்ய ஆர்வம் கொண்டான்.

தன் பல்லவ தேசத்தில் உள்ள பல ஓவியர்களையும் சிற்பிகளையும் அங்கு அனுப்பி அவற்றைப் பற்றி ஆய்வுகள் மேற்கொண்டான்.பின்னர் தன் தேசத்தில் எங்கெல்லாம் மிகப் பெரிய பாறைகளும் , மலைகளும் உள்ளனவோ அவற்றில் குடைவரை குகைக் கோயில்கள், ஓவியங்கள் செய்தான்.

இவன் மல்யுத்தத்தில் மிகவும் கெட்டிக்காரன்.மக்கள் அவனை ”மாமல்லன்” என்று அழைத்தனர்.தன் துறைமுக ஊருக்கு அவன் ’மாமல்லபுரம” என்ற பெயரை வைத்தான்.அவ்வூரின் இயற்கையான பெயர் ’கடல் மல்ல” ஆகும்.

 குறிப்பாகத் தன் துறைமுக நகராகிய மல்லையில் பல பெரிய பாறைகளையும் கற்குன்றுகளையும் அழகிய சிற்பங்களாகவும் கோயில்களாகவும் உருவாக்கினான்.

பல்லவ மன்னர்கள் உருவாக்கிய சிவன் கோயில்கள் ”பல்லவனீச்சுரம்” எனப்படும்.விஷ்ணு கோயில்கள் ”விண்ணகரம்” எனப்படும்.

திருச்சிமலைக்கோட்டை, நாமக்கல், சித்தன்ன வாசல், காஞ்சிபுரம், மல்லை ஆகிய பல ஊர்களில் பல்லவர்கள் அமைத்த கற்கோயில்களும் குகைக் கோயில்களும் உள்ளன.

பல்லவர்கள் சிவபெருமானின் நந்தியைக் கொடிச் சின்னமாகவும், சிங்கத்தை அரச முத்திரையாகவும் கொண்டனர்.

முழுக்க முழுக்க கருங்கற்களைக் கொண்டு கோயில்களை உருவாக்கும் கட்டிடக் கலையைப் பல்லவர்களே தமிழ்நாட்டில் அறிமுகம் செய்தனர்.புராண இதிகாசக் காட்சிகளைச் சிற்பங்கள் மற்றும் ஓவியங்கள் மூலம் வெளிப்படுத்தும் கலைகளை அதிக அளவில் அறிமுகம் செய்தனர்.

_____________________________________

நகரேஷு காஞ்சி

பாரத தேசத்தில் மக்களுக்கு வாழ்க்கையில் நல்வழிகாட்டும் பெரியோர்கள் அதிகம் வாழ்ந்த நரகங்கள் ஏழு.அவை சப்த மோக்ஷ புரிகள் எனப்படும்.அதில் ஒன்று காஞ்சிபுரம்.

வடமொழியின் மிகச் சிறந்த புலவன் மஹாகவி காளிதாஸன் காஞ்சிபுரத்தை ”நகரேஷு காஞ்சி” - நகரம் என்றால் அது காஞ்சியே என்று பாடியுள்ளார்.

பாரவி, பாணினி ஆகிய மிகப்பெரிய வடதேசத்துப் புலவர்களும், சைனாவின் ஹ்வாங் ஸ்வாங் போன்ற பல வேற்று தேச அறிஞர்களும் காஞ்சிபுரம் வந்து வாழ்ந்துள்ளனர்.

காஞ்சிபுரத்தின் சிறப்பை சிலப்பதிகாரம் - மணிமேகலை ஆகிய காப்பியங்கள் எடுத்துக் கூறும்.குறிப்பாக மணிமேகலையில் இவ்வூரின் அழகு, அமைப்பு பற்றி  அதிகம் பேசப்படுகிறது.

நமது காலத்தில் கல்கி க்ருஷ்ணமூர்த்தியின் புகழ் பெற்ற சரித்திர நவால் சிவகாமி சபதம்.அதில் இவ்வூர் பற்றிய மிக அதிகமான தகவல்களை ஆசிரியர் எழுதியுள்ளார்.

மணிமேகலை - சோழ தேசத்துப் பூம்புகாரில் வாழ்ந்த கோவலனுக்கும் மாதவிக்கும் பிறந்த மணிமேகலை தன் 18ஆம் வயதில் புத்த துறவி ஆனாள். இவ்வூரில் தங்கி புத்த மதம் பற்றிய கல்வி கற்றாள். அகிம்சாவாதம் மூலம் சிறையில் வாழ்ந்த பல கைதிகளைத் திருத்தினாள்.பின்னர் அக்ஷய பாத்திரம் மூலம் ஆதரவு அற்றோர்க்கு அன்னதானம் செய்த பெருமை இவ்வூருக்கே உண்டு.

ஆன்மீக பூமி - ஆழ்வார்களில் பொய்கை ஆழ்வார் இவ்வூரில் அவதரித்தார்.பல ஆழ்வார்கள் இவ்வூரில் உள்ள விஷ்ணு கோயில்களைப் பாடி உள்ளனர்.

அப்பர், சுந்தரர், சம்பந்தர், மாணிக்கவாசகர், பல்லவ மன்னன் காடவர்கோன், பட்டிணத்தார், அருணகிரியார் ஆகியோரும் பல பாடல்களால் இவ்வூரில் உள்ள சிவன் கோயில்களைப் பாடி உள்ளனர்.

திருத்தொண்ட நாயனார், சாக்கிய நாயனார், ஐயடிகள் காடவர்கோன் போன்ற சிவபக்தர்கள் இவ்வூரில் வாழ்ந்தனர்.

கி.பி ஏழாம் நூற்றாண்டில் வாழ்ந்த ஆன்மீக ஞானி ஸ்ரீஆதி சங்கரர் காஞ்சியில் மடம் ஏற்படுத்தி மக்களுக்கு நன்மைகள் செய்தார்.இன்றும் அம்மடம் இயங்கி வருகிறது.

மேலும் ஆன்மீக குருவான ஸ்ரீமத் ராமானுஜர் [12 கி.பி], வேதாந்த தேசிகர் [14 கி.பி] ஆகியோர் இவ்வூரில் பலகாலம் வாழ்ந்து மக்களுக்குத் தொண்டு செய்தார்கள்.

நமது காலத்தில் தமிழகத்தின் முதலமைச்சராக இருந்த பேரறிஞர் அண்ணா இவ்வூரில் பிறந்து வாழ்ந்தவர்.அவரது வீடு இன்று அழகிய பார்வை அகமாக மாற்றப்பட்டு உள்ளது.

தமிழகத்தின் முதல் கல் கோயில்

 தமிழகத்தில் முதல் கல் கோயில் காஞ்சியில் உள்ள கைலாச நாதர் கோயில்.

இதை மாதிரியாகக் கொண்டே பின்னர் பல அரசர்களும் பல வகையில் கற்கோயில்கள் அமைத்தனர்.குறிப்பாக மூலஸ்தானத்தை முழுக்க முழுக்க கருங்கற்களால் கட்டும் அமைப்பைப் பல்லவர்களே அறிமுகம் செய்தனர்.

கல்லூரிகள் - அக்காலத்தில் காஞ்சியில் புத்த மதக் கல்லூரி, சமண மதக் கல்லூரி, ஆயுர்வேத மருத்துவக் கல்லூரிகள் இருந்துள்ளன.குறிப்பாக கிழக்கு தேசங்களில் இருந்து புத்த மதத்தை அறியப் பலர் வந்துள்ளனர்.

மேலும் காஞ்சியை சிவ காஞ்சி, விஷ்ணு காஞ்சி, பெளத்த காஞ்சி, ஜைன காஞ்சி என்று அக்காலத்தில் பிரித்தனர்.சுமார் 1000 பெரிய சிறிய கோயில்கள் இருந்துள்ளனர்.இன்று சுமார் 100 கோயில்கள் உள்ளனர்.

ஊரின் மிக முக்கியமான கோயில் காமாக்ஷி அம்மன் கோயில் ஆகும்.இதைக் காம கோட்டம் என்று பழைய நூல்கள் அழைக்கும்.

பஞ்சபூத ஸ்தலங்களில் பூமி ஸ்தலம் இங்குள்ள ஏகாம்பரேஸ்வர் கோயில் ஆகும்.நம் நாட்டின் மிகப் பெரிய கோயில்களில் இதுவும் ஒன்று.மண்ணால் ஆன சிவலிங்கமும், 4000 ஆண்டுகள் வயதான மாமரமும் இங்கு உள்ளன.

காஞ்சியில் மொத்தம் 18 விஷ்ணு கோயில்கள் உண்டு. அவற்றுள் ஸ்ரீவரத ராஜ பெருமாள் கோயில் மிகவும் பெரியதாகும். உலகளந்த பெருமாள் கோயிலில் பூஜை செய்த தமிழ் அறிஞர் பரிமேல் அழகர் என்பர் கி.பி 10ஆம் நூற்றாண்டில் திருக்குறளுக்கு அருமையான விளக்க உரை எழுதினார்.அதையே இன்றும் நாம் படிக்கிறோம்.

காஞ்சிபுரத்தில் உள்ள புகழ் பெற்ற முருகன் கோயில் குமர கோட்டம் ஆகும்.இங்கு  

தான் கி.பி 10ஆம் நூற்றாண்டில் கச்சியப்ப சிவாச்சாரியார் கந்தபுராணத்தைத் தமிழில் எழுதினார்.

காஞ்சிபுரம் பட்டுப்புடவைக்கும், பச்சரிசி இட்லிக்கும் புகழ் பெற்றது.புகையை விட மெல்லிய பட்டு ஆடைகளைப் பல்லவர்கள் மேற்கு நாடுகளுக்குக் கப்பல்கள் மூலம் ஏற்றுமதி செய்துள்ளனர்.

காஞ்சிபுரம் இன்று ஒரு மாவட்டத் தலைநகர்.இவ்வூர் சென்னையில் இருந்து பெங்களூரு தேசிய நெடுஞ்சாலையில் 72 Km தொலைவில் அமைந்துள்ளது.ஆந்திர கர்நாடக மாநிலப் பேருந்துகள் அதிகம் வரும்.மெட்ரோ மின்சார ரயிலும் சென்னையில் இருந்து உள்ளன.

Sakthi Foundation

அசோகர் பின்பற்றிய நல் வழி

பாரத தேசத்தின் மிகப்பெரிய மாமன்னர்களுள் ஒருவர் அசோகர்.இவர் கி.மு.273ல் பதவி ஏற்றுக் கொண்டார்.இவர் புத்தர் அவதாரம் செய்து சுமார் 500 ஆண்டுகளுக்குப் பின் வாழ்ந்தார்.இவர் புத்த பெருமானின் அறிவுரைகளை மிகவும் நுட்பத்துடன் ஆழ்ந்து கற்று, தன்னுடன் தொடர்பு படுத்தி அறிந்ததால், தன்னை மாற்றிக் கொண்டார்.

மிகக் கொடுமையான கலிங்கப் போருக்குப் பின் அவருக்கு இம்மாற்றம் ஏற்பட்டது என்பது உண்மை.தன் வாழ்க்கையில் புத்த சமயத்தை உலகம் முழுவதும் பரவச் செய்த மிக உயர்ந்த திருப்பணியை அசோகர் செய்துள்ளார்.

அவர் தன் ஆட்சிக் காலத்தில் பல புத்த சமய வழிபாட்டு இடங்களையும், புத்தர் நினைவுச் சின்னங்களையும் ஏற்படுத்தினார்.வரலாற்றைக் கூறும், அழகிய சிற்ப வேலைப்பாடுகள் கொண்ட ஸ்தூபி கோபுரங்கள் [தூண்கள்] பல உருவாக்கினார்.அவற்றுள் சான்ச்சியும் சாரநாத்தும் மிகவும் முக்கியமானவை.

புத்தர் பிறந்த லும்பிணி வனத்தில் விஹாரமும் [வழிபாட்டு ஸ்தலம்], அவர் ஞானம் பெற்ற புத்த கயாவில் கோவிலும், அவர் முதன்முதலில் தன் தர்மநெறியை போதித்த சாரநாத்தில் தர்ம சக்ரத்துடன் கூடிய ப்ரமாண்ட ஸ்தூபியையும், அவர் பல காலம் உபதேசம் செய்த வைசாலியில் விஹாரமும், அவர் முக்தி அடைந்த குஷி நகரில் விஹாரமும் அமைத்தார்.இலங்கை, சைனா, ஜாவா, சுமத்ரா, பல கிழக்கு தேசங்களுக்கு இவர் காலத்திலேயே புத்த மதம் பரவியது.

இவரது அனுமதியுடன் வரலாற்றில் மக்கள் தெரிந்து கொள்ள வேண்டிய பல உயர்ந்த கருத்துகளை இவர் காலத்திலேயே ஸ்தூபிகளில் கல்வெட்டுக்களாகப் பொறித்தனர் அரசாங்கத்தினர்.மாணவர்களுக்குத் தேவையான அசோகர் பின்பற்றிய சில உயர் தர்ம நெறிகளை இப்பகுதி மூலம் பகிர்ந்து கொள்கிறோம்.

அசோகர் கூறுகிறார்....

”தாயையும் தந்தையையும் முதலில் மனிதன் மனதார மதிக்க வேண்டும்.

வீட்டில் உள்ள உறவினரையும் சுற்றத்தையும் அன்புடன் மதிக்க வேண்டும்.

எண்ணும் எழுத்தும் கற்றுக் கொடுத்த ஆசிரியருக்கு உயர்ந்த மரியாதையை மனிதன் தர வேண்டும்.

உலகில் உள்ள ஒவ்வொரு உயிரையும் மதிக்க வேண்டும்.

முடிந்த வரை அசைவ உணவைத் தவிர்த்து, உயிர்க்கொலையைத் தவிர்த்திடுக.

கோயில்களில், விழாக்களில் உயிர்கள் பலியிடுவதைத் தடை செய்ய வேண்டும்.

விளையாட்டுக்காகக் கூட ஒரு உயிரைத் துன்புறுத்த வேண்டாம்.

சிறியவரானாலும் வயதானவர் ஆனாலும் தர்மத்தின் வழியில் நடக்க முயற்சி செய்ய வேண்டும்.

நாம் பின்பற்றும் நல்ல விஷயத்தை நான்கு பேருக்கு எடுத்துக் கூற வேண்டும்,அவர்களை வழிப்படுத்த முயற்சிக்க வேண்டும்.

மனிதர்களுக்கும் விலங்குகளுக்கு உடல் ஆரோக்யத்தைக் காக்கும் மருத்துவக் கூடங்களை நிறுவுகிறேன்.அதில் மூலிகைகள் கிடைக்க ஏற்பாடு செய்கிறேன்.இல்லாத மூலிகைகளை விளைவிக்கவும் வேண்டுகிறேன்.

அரண்மனையில் உணவில் அசைவம் சேர்ப்பதைப் படிப்படியாகக் குறைக்க ஆணை இடுகிறேன்!

பெற்றோர்கள், படித்த பண்புள்ளவர்கள், ஆன்மீகப் பெரியோர்கள் ஆகியோரின் அறிவுரைகளைப் பின்பற்றுக.

குறைவாகச் சேமியுங்கள், குறைவாகச் செலவு செய்யுங்கள்!

நண்பர்களிடம் உண்மையான நட்பைக் காட்டுங்கள்.

கஷ்டப்படும் உறவினர்களுக்கும், நண்பர்களுக்கும் முடிந்தவரை உதவுக.

ஒரு நல்ல செயலைச் செய்வது மிகவும் கடினம்.அதைச் செய்ய முயற்சிப்பவனே நாட்டுக்குத் தேவை.

குற்றவாளிகள் தங்கள் குழந்தைகள் மற்றும் வீட்டின் வயோதிகர்களின் எதிர்கால நலனைக் கருத்தில் கொண்டு விடுதலை செய்யத் தகுதி உடையவர்கள் ஆனால் விடுதலை செய்க.

எந்த நேரத்திலும் எந்த இடத்திலும் மக்களின் தேவைக்கான செய்தி என்னை வந்து அடையலாம்.

மக்களின் நலனுக்காக என்னை எளிதில் பார்க்க அனுமதிக்கவும்.

அரசனின் உத்தரவுகளை, செய்திகளை உடனுக்குடன் மக்களுக்கு அறிவிக்க வேண்டும்.

மக்களின் நலனைத் தவிர அரசனுக்கு வேறு நற்கதி என்பதே இல்லை!

மனுதாரர்களை நீண்ட காலம் காக்க வைக்காமல் விரைவில் அவர்களின் தேவைகளைப் பூர்த்தி செய்ய ஏற்பாடு செய்க.

அவசரமான வேலைகள் எதுவாயினும் மன்னனும் மக்களும் அதைத் தள்ளிப்போடுவதால் இழப்புகள் ஏற்படும்.

அனைவரும் முடிந்தவரை புலன் அடக்கம் கொண்டு தீய செயல்களில் ஈடுபடுவதைத் தவிர்க்கவும்.

வெறும் சுகபோகக் கேளிக்கைகளில் மட்டும் மனம் செலுத்தாமல் ஆன்மீக ஞானத்துக்கு மக்கள் பாடுபடுக.நானும் இப்போது உல்லாசப் பயணங்களை ஆன்மீகப் பயணமாக மாற்றிக் கொண்டேன்.இவ்வாண்டு புத்த கயாவுக்குச் செல்கிறேன்.

வேலைக்காரனையும் அடிமையும் அன்புடன் நடத்துக.

கண்மூடித்தனமான வெத்துச்சடங்களில் ஈடுபடாமல் அதைப் புரிந்து கொண்டு செய்க.குறிப்பாகப் பெண்கள் மூடத்தனமான சடங்குகளைத் தவிர்த்திடுக.

உயர்ந்த தர்மத்தின் வழியில் வாழ்வது என்ற உயர்சடங்கை அனைவரும் செய்க.

ஆன்மீகப் பெரியோர்களையும், ஆசிரியர்களையும் கெளரவம் செய்வது நல்லது.

உண்மையைப் பிறருக்கு எடுத்துச் சொல்வதில் பயம் வேண்டாம்.

வெளிப்படையான மரியாதை மற்றும் உயர் வகைப் பரிசுகள் எனக்கு உங்களிடம் இருந்து வேண்டாம்! தயவு செய்து நல்லவனாக வாழ்க.அதுவே எனக்குப் பிடிக்கும்!

யாரையும் தரக்குறைவாக மதிப்பிட வேண்டாம்.

சரியான காரணம் இல்லாமல் யாரையும் குறை கூற வேண்டாம்.

அளவுடன் பேசுக.

பிற சாதிகள், பிற மதத்தினரை மதிக்க வேண்டும்.அப்போதே ஒற்றுமை ஏற்படும்.

முயற்சி செய்க, சோம்பலை விடுக, பொறுமையைக் கடைப்பிடித்திடுக, செய்யும் செயலில் ஈடுபாட்டுடன் இருக்க வேண்டும்.

தினமும் நீங்கள் செய்த நல்ல காரியங்களையும் கெட்ட காரியங்களையும் நினைத்துப் பாருங்கள், அப்போது உங்களை நீங்களே மாற்றிக்கொள்ள வழி கிடைக்கும்.

நல்ல காரியங்களைச் செய்யும் போது அதைத் தான் செய்ததாகவும், கெட்ட காரியம் செய்த போது அதைத் தான் ஏற்க மறுப்பதும் மிகவும் அறியாமை ஆகும்.

பேராசை, கோபம், அகங்காரம் ஆகியன வன்முறைக்கு மக்களை இட்டுச் செல்லும்.அவற்றை மனதில் கொள்ளவே கூடாது!

கிளிகள், வாத்துகள், குருவிகள், வெளவால், பெண் ஆமை, ஆற்று ஆமை, எலும்பு இல்லாத மீன், முள்ளம்பன்றி, அணில், மான், காளைமாடு, குரங்கு, காண்டாமிருகம், பெண் வெள்ளாடுகள், பெண் செம்மறி ஆடுகள், பெண் பன்றிகள், குட்டி போட்டுப் பாலூட்டும் எவ்விதமான விலங்குகள், சேவல்கள் ஆகியன கொல்லப்படக் கூடாது.

யானைகள் தண்ணீர்க் குடிக்கும் குளங்களில் மீன்களைக் கொல்லல் லூடாது.

ஒரு உயிரினத்துக்கு நாமாக மற்றொரு உயிரை உண்ணக் கொடுக்கக் கூடாது.

பெளர்ணமி காலங்களில் அசைவம் தவிர்க்க வேண்டும், உண்ணா நோன்பு இருந்திடுக.அசைவ உணவினை விற்கவும் தடை செய்கிறேன்!

அறுவடை செய்யப்பட்ட வயல்களைக் கொளுத்தத் தடைச் சட்டம் போடுகிறேன்.

மக்கள் அனைவரும் நான் பெற்ற குழந்தைகள் என்ற எண்ணம் அரசனுக்கு வர வேண்டும்.நல்ல பணியாளிடம் தன் குழந்தையை ஒப்பட்டைத்த தாய் போல் அரசன் தரமான நேர்மையான அரசாங்க அலுவலரிடம் நாட்டை ஒப்படைத்து நிம்மதி கொள்கிறான்.

சிறைக் கைதிகள் அவர்களின் மாற்றத்தின் அடிப்படையில் அவர்தம் பிறந்த தினத்தன்று விடுதலை செய்யப்படலாம்.

விசாரணையின் போது காவலரால் கைதி இறந்தால் அக்காவலர் மிகவும் கொடுமையாக தண்டிக்கப் படுதல் வேண்டும், அபராதம் செலுத்த வேண்டும்!

மரண தண்டனைக் கைதிகளின் உறவுகள் தகுந்த ஆதாரத்துடன் அதைத் தடுக்க என் முன் வழக்கைக் கொண்டு வரலாம்.

மக்கள் பயணிக்கும் வழிகளில் நிழலைத் தர ஆல மரங்கள் நட்டுள்ளேன்.அதன் மூலம் பசுமையும் தட்பவெப்பமும் சீராகும், மழைக்கு வழி செய்யும்.

தரமான மாந்தோப்புகளை ஏற்படுத்தி உள்ளேன்.அதன் மூலம் பலருக்கு வேலை கிடைத்துள்ளது.

அரைக் கிலோமீட்டர் தூர இடைவெளியில் கிணறுகள் வெட்டப்பட்டுள்ளன.அவற்றின் தூய்மையை மக்கள் கருத்தில் கொள்ள வேண்டும்.

மனிதனுக்கும் விலங்குகளுக்கும் தனித்தனியே குடிநீர் வசதிகள் செய்துள்ளேன்.

பயணிகள் தங்கி, உண்டு இளைப்பாறச் சத்திரங்கள் எழுப்பியுள்ளேன்.

எனக்குப் பின்வரும் அரசர்களும் மக்களுக்கு இதையே செய்ய வேண்டுகிறேன்”

என்று தன் கல்வெட்டுக்கள் மூலம் தன் அசர ஆணைகளை, மக்களுக்கு வேண்டிய அறிவுரைகளை அசோகர் கூறி இருக்கிறார்.

Sakthi Foundation
”ஊர் கூடினால் தான் தேர் நகரும்” - தைப்பூசம் கட்டுரை

இன்று [24.1.2016] தமிழகத்திலும் இலங்கை, சிங்கப்பூர் மற்றும் மலேஷிய தேசங்களில் முருகப் பெருமானுக்குத் தைப் பூசத் திருநாள் கொண்டாடப்படுகின்றது.

நமது செந்துரையில் UNI5 CENTERன் சார்பில் பல ஆண்டுகள் முன் தைப்பூசம் ஒரு முறை மிக விமர்சியாகக் கொண்டாடப் பட்டது.

தற்போதும் பள்ளியில் முருகனுக்கு மிக விமர்சியாகத் தைப்பூசம் நடத்தப்பட்டது.

தை மாதம் என்பது தமிழகத்தில் அறுவடை முடிந்த காலம்.அக்காலத்தில் அதிகம் விவசாயிகள் வாழ்ந்த காலம்.அப்போது கையில் அறுவடையின் பலனாகப் பணமும் பொருளும் இருக்கும் காலம்.

அதனால் தான் தை மாதத்தில் அதிகம் திருமணம் வைத்தனர்.”தைப் பிறந்தால் வழி பிறக்கும்” என்ற பழமொழியும் அதை அடுத்தே தோன்றியது.

தைப் பெளர்ணமி நாளில் பொங்கலுக்கு அடுத்து மக்கள் ஊர் தோறும் ஒன்று கூடித் தங்கள் தெய்வத்திற்கு நன்றி கூறும் விழாவே பூசம் எனலாம்.

பூசத்தில் மக்கள் குறிப்பாகப் பாத யாத்திரை செய்வதன் மூலம் உடலை ஆரோக்யத்தைப் புத்துணர்ச்சி பெற வைப்பர்.

மேலும் அப்பாத யாத்திரை போகும் அனைத்துத் தரப்பு மக்களுக்கும் உடை, உணவு ஆகியன வழங்கிடுவர்.

தங்களை ஆளும் பரம்பொருளைத் தம் இஷ்ட தெய்வமாகக் கொள்ளும் மக்கள் அத்தெய்வத்தைத் திருத்தேரில் இருத்தி ஒன்று கூடி இழுத்துப் பெருமை செய்வர்.

பால் குடம் எடுத்தல், காவடி எடுத்தல், அலகு குத்துதல் போன்ற பல விழா நிகழ்வுகள் பூசத்தில் நிகழும்.

பால் குடம் - கால்நடைகளில், குழந்தைகளின் நலம், வயிற்றில் பால் வார்த்தால் போல் தன் ப்ரச்சனை தீரப் பெற்ற ஒரு பக்தன் தன் இஷ்ட தெய்வத்துக்குப் பால் குடம் எடுக்கிறான். மேலும் பால் த்யாகத்தின் சின்னம்.த்யாக உணர்வுடன் தான் குடும்பத்திலும் சமூஹத்திலும் மனிதன் வாழ்தல் அவசியம் என்பதைப் பால் குடம் குறியீடாக உணர்த்தும்.

காவடி - ”குடும்ப பாரத்தைத் தோளில் சுமக்கிறேன்” என்பத்து பலரின் வாக்கு.
விதவிதமான அழகிய காவடிகளை பக்தர்கள் தோள்களில் மாறி மாறிச் சுமந்து ஆடிப்படிச் சென்று இறைவனுக்கு அக்காவடி பாரத்தை இறக்குவது வழக்கம்.வாழ்க்கையின் அனைத்து விதமான ப்ரச்சனைகளுமே பாரம் தானே!? தன் தெய்வத்தின் அருளால் அப்பாரம் பால் போல், பூப்போல், மயிலிறகு போல் மென்மையாக மாறிட பால், மயில், புஷ்பக்காவடிகளை நேர்த்திக் கடன் செய்வதே ”காவடி எடுப்பு” ஆகும்.காவடியை அடிப்படையாகக் கொண்டு ஆடிப்பாட உருவானதே காவடிச்சிந்து ராகமும் இலக்கிய வகையும் ஆகும்.

அலகு குத்துதல் என்பது அக்யுபங்க்சர் மருத்துவத்துடன் தொடர்புடையது.தான் தன் உடல் என்ற சுய அடையாளத்தில் இருந்து பக்தன் வலியை மறந்து கூரிய வேலை முதுகிலும், வாயிலும் நாவில் குத்திக் கொள்வதே அலகு.

தைப்பூச விழா மிகச் சிறப்புடன் கொண்டாடப் பட்டதை ஞானசம்பந்தரின் மயிலாப்பூர் தேவாரம் பதிவு செய்கிறது.

தமிழ்த் தெய்வமாம் முருகனுக்கு மிக விமர்சியாகப் பூசம் கொண்டாடப் படுகிறது.

உயிர்க்கொலையை எதிர்த்து உள் ஒளியைக் காணத் தூண்டிய இராமலிங்க வள்ளலார் ஜோதியாகிப் பரத்துடன் கலந்த நாள் தைப்பூசமே ஆகும்.

”ஊர் கூடினால் தான் தேர் இழுக்க முடியும்” என்ற பழமொழிக்கு ஏற்ப அக்காலத்தில் அறுவடை முடிந்த பின் ஓய்வு காலத்தில் பொங்கலுக்கு அடுத்து வரும் முதல் ஆன்மீக விழா பூசம் தான்.இதன் மூலம் அக்காலத்தும் இக்காலத்தும் குடும்பங்கள் ஒன்று கூடும் சமூஹ அமைப்பைக் காண்க.

மலேஷியாவில் பத்து மலைக் குகை முருகன் கோயிலில் பல லட்சம் அன்பர்கள் பூசம் கொண்டாடுவது வழக்கம்.உலகின் மிக உயரமான முருகன் சிலையும் இங்கு தான் அமைகிறது.

சிங்கப்பூரில் கொரியர்களும் சீனர்களும் பூச விழாவில் பங்கேற்பது வெகு இயல்பான ஆன்மீக ஒற்றுமைக்கான சான்று.

இலங்கையில் கண்டி கதிர்காமம் முருகன் கோயில் பூச விழாவிற்குப் பெயர் போனது.

அறுபடை வீடுகள், விஷ்ணு ஆலயங்கள் ஆகிய ஸ்தலங்கள் பூசத்தைக் கொண்டாடும்.

தைப்பூசம், மாசி மகம், பங்குனி உத்திரம், சித்திரை, வைகாசி விசாகம் ஆகியன இனி வரிசையாக வரும் தேரிழுக்கும் விழாக்கள் ஆகும்.பல ஊர் மக்களும் தத்தம் வசதிக்கும் காலத்துக்கும் ஏற்ப இம்மாதங்களில் ஒன்றில் தேர்த்திருவிழா எடுப்பது வழக்கம்.

வைகாசிக்குப் பின் பருவமழை ஆரம்பிக்கும் முன் மீண்டும் நிலப்பணிக்கு உழவர்கள் திரும்புவதோடு விழாக்கள் சற்று குறைவதைக் காண்கிறோம்.

தொழிலையும் இயற்கையையும் பொருளாதாரத்தையும் அடிப்படையாகக் கொண்டே பாரத தேசத்து விழாக்கள் அமைவன.

சிதம்பரம் பொன்னம்பலத்தில் வியாக்ரபாதரும் பதஞ்சலி முனிவரும் தில்லைக்கூத்தனை ப்ரதிஷ்டை செய்த நாளும் தைப்பூசமே!

இன்று தைப்பூச விழாவை மக்கள் மிக ஆடம்பர விளம்பரத்துடன் பக்தி இல்லாமல் கொண்டாடுவதைக் காண்கிறோம்.

அமைதியாக, ஆழ்ந்த பக்தியுடன், விழிப்புணர்வுடன், கலை உணர்வுடன் விழாக்கள் கடைப்பிடிக்கப்பட வேண்டும்.

”ஊர் கூடினால் தான் தேர் நகரும்” என்ற பழமொழியை இனி வரும் சமூஹம் நன்கு உணர இவ்விழா உதவும்!

Sakthi Foundation

தர்மம் மிகு சென்னையில் புனித தாம்ஸின் ஜீவசமாதி

புனித தாமஸ் பாரத தேசத்தில் குறிப்பாக மயிலையில் உள்ள சாந்தோம் பகுதியில் வாழ்ந்துள்ளார் என்பதில் ஐயம் இல்லை. தாமஸ் தம் ஆத்மா  ஷாந்தி அடைந்ததால் அவ்வூர் சாந்தோம் ஆனது. மயிலையைச் சுற்றியுள்ள பகுதிகளில் அவர் ஏசுவின் ஆன்மீக நெறிகளை ப்ரச்சாரம் செய்துள்ளார்.

அவர் காலத்தில் அவர் பரப்பிய கிறிஸ்துவ நெறி இன்றையதில் இருந்து சற்று மாறுபட்டதே! உள்ளூர் அரசனின் ஆதரவும் மக்களும் அவருக்கு இருந்துள்ளது.

அவர் கல்லால் செதுக்கிய புனிதச் சிலுவையும் அதைச் சுற்றியுள்ள திருவாச்சியும் அதை உள்படுத்த வடித்தக் கருங்கல் மண்டபமும் புனித தீர்த்த பெருங்கிண்ணமும் சாந்தோம் தேவாலய அருங்காட்சியகத்தில் உள்ளன.

இருபுறமும் சிம்மங்கள் கொண்ட பல்லவர் காலத் தூண்களுடன் கூடிய தோரண வாயிலுடன் கூடிய மூலஸ்தானமே கற்சிலுவையுடன் தாமஸ் அமைத்துள்ளார்.மக்களின் கலை, பண்பாடு, நாகரீகம் ஆகியவற்றை அடிபடையாகக் கொண்டே சமயங்கள் வளர்கின்றன.

ஆனால் போர்த்துகீஸியர்களால் பிற்காலத்தில் அவர் எழுப்பிய தேவாலயம் முற்றிலும் அகற்றப்பட்டு ஐரோப்பியக் கட்டிடக் கலைப்பாணியில் அமைந்து விட்டது.

இவையெல்லாம் மக்கள் மனதில் வேற்றுமையை ஏற்படுத்தும் உத்திகள்.தாம் பின்பற்றும் ஒரு சமயம் தன் மண்ணினுடையதே அல்ல என்பதை மக்கள் பிரிவினைப் பார்வையில் பார்க்க ஆரம்பித்தும் விட்டனர், அதனால் உள் தேசத்து மதப்பூசல்கள் அதிகரித்தன.

இன்றைய கிறிஸ்துவ நூல்கள் கூறுவது போல பல ஆயிரக் கணக்கில் மக்கள் கிறிஸ்துவத்தைத் தழுவியிருப்பின் கண்டிப்பாக மூவேந்தர் தம் காலத்து இலக்கியங்களும் கல்வெட்டுகளும் கலைகளும் அவற்றைப் பதிவு செய்திருக்கும்.

ஆனால் மக்கள் தாமஸ் கூறிய ஆன்மீக நெறியைப் பின்பற்றினரே ஒழிய ஒரு மதத்தை அல்ல.

தாமஸ் மறைந்த பின் அவரது பூதவுடல் மயிலை வாழ் மக்களால் மன்னனால் மிக்க மரியாதையுடன் ஜீவ சமாதி ஆக்கப்பட்டது.

அவரது சமாதியில் வேண்டிக் கொண்ட போதும், புனித மண்ணை உட்கொண்ட போதும் உடல் பிணிகள் நீங்கின.பலமுறைக் கல்லறை அதற்காகத் திறக்கப் பட்டுள்ளதை வரலாறு காட்டுகின்றது.

தாமஸ் பாரத தேசம் வந்ததற்கான வரலாற்றுக் குறிப்புகள்....

கி.பி 250

தாமஸ் மூலம் இந்தியாவும் அதைச் சுற்றியுள்ள தேசங்களும் ஏசுவின் ஆன்மீக நெறிகளை அறிந்தன. [ஒரு சிரியா மொழி நூல்]

கி.பி 396

சிரிலோனாஸ் என்ற கிறிஸ்துவ குரு சிரியா மொழியில் ஒரு கவிதை எழுதியதில் தாமஸ் பாரத தேசத்தில் பணி செய்ததைக் குறிப்பிடுகிறார்.

கி.பி 4

எடெசா நகர் கிறிஸ்துவச் சபைக்குத் தாமஸின் உடலின் சில எலும்புகள் கொண்டு வரப்பட்டன.

அதே நூற்றாண்டில் க்ரகோரி நஸியான்ஸன் என்பவர், ”ஏசுவின் மாணவர்கள் பூமியில் பல தேசங்களில் பணியாற்றினாலும் அத்தேசத்து மக்களிடையே வேற்றுவர்களாகத் தான் கருதப்பட்டுள்ளனர், குறிப்பாகத் தாமஸ் இந்தியாவில் பல இன மக்களுடன் வாழ்ந்தார்....”

கி.பி 5

யோவான் பொன்வாய் என்ற கிறிஸ்துவ குரு, ”ஏசுவின் பல மாணாக்கரின் கல்லறைகள் எங்குள்ளன என்பதைப் பற்றித் தெரியவே இல்லை, ஆனால் பாரத தேசத்தில் தாமஸின் கல்லறை உள்ளது....”

கி.பி 6

தூர்ஸ் நகர ஆயர் ஃப்ரான்ஸ், ”இந்தியாவின் மயிலை தாமஸின் கல்லறைக்கு அருகில் மிக அழகிய கோயிலும், சன்யாசிகள் மடமும் உள்ளன” [இவையே இன்று அருங்காட்சியகத்தில் உள்ள பல்லவர் கால ஜீவசமாதிக் கோயிலின் எச்சங்கள், மேலும் பல சமயத்தவரும் தாமஸின் கல்லறையில் தொழுதுள்ளனர்.அவ்விடத்திற்கு அருகில் சன்யாச மடம் இருந்திருக்க வாய்ப்புண்டு.அல்லது அது கபாலீச்சரத்தின் மடமாகவும் இருக்கலாம்.

கி.பி எட்டாம் நூற்றாண்டு ஜூலை எட்டாம் நாள் தாமஸின் பூத உடலின் எலும்புகள் எடெசா நகருக்குக் கொண்டு வரப்பட்டன என்று சில கல்வெட்டுகள் கூறுவன.

ரோம் நகரில் உள்ள மிகப்பழைய குறிப்பு ஒன்று டிசம்பர் 21ஆம் நாள் தாமஸ் மறைந்தார் என்கிறது.

கான்ஸ்டாண்டிநோபிள், ”இந்திய அரசனால் தாமஸ் கொல்லப்பட்டார்” என்கிறார்.இவர் மூலம் தான் தூய ஆன்மீக நெறியான கிறிஸ்துவம் மதமாக்கப் பட்டது என்பதில் ஐயமே இல்லை.

தாமஸ் உயிர்விட்ட இடம் இன்றைய St.தாமஸ் மலை என்பதில் ஐயமே இல்லை.

அம்மலையைக் ”கல்மீனா” - கடினமானப் பாறைகளும் மணமும் சூழ்ந்த குன்று என்று போர்த்துகீஸியர் குறிப்பிடுவர்..

கி.பி 883ல் ஆங்கிலேய அரசன் போரில் வெற்றி பெற்றதன் காணிக்கையாக சில விலைமிக்க பொருட்களைத் தாமஸின் ஜீவசமாதிக்கு அனுப்பியுள்ளான்.

கி.பி 1293ல் மார்கோபோலோ [வெனிஸ் யாத்ரீகர்] கூறுகிறார்,

”கிறிஸ்துவர்களும் சிரியா தேசத்து அன்பர்களும் கடல் பயணம் மேற்கொண்டு தாமஸின் கல்லறையை தரிசனம் செய்வதைக் கண்டேன்.அவர்கள் தாமஸை ”அவரியான்” - மிக உயர்ந்த மனிதன் என்றே அழைக்கிறார்கள்.

தாமஸின் கல்லறை மண் சிவப்பாக உள்ளது.அதை எடுத்து உட்கொள்ளும் வ்யாதியஸ்தன் குணமாகிறான்.இப்பணியை இங்குள்ள கிறிஸ்தவர்கள் மேற்கொள்கிறார்கள்.இறைவனின் அருள் கலந்த தாமஸின் கருணையால் தான் இது நிகழ்கிறது...”

கி.பி 13

”தாமஸ் இறந்தவுடன் மலாப்பில் [மயிலாப்பூர்] கல்லறை வைக்கப்பட்டார்” - பசாரா நகர் மார்ஸலோமா ஆயரின் குறிப்பு.

அதே நூற்றாண்டில் மார்கோபோலோ மாபார் கடற்கரையில் தாமஸின் கல்லறைத் தான் கண்டதாகக் கூறுகிறார்.

கி.பி 14

''தாமஸின் கல்லறை இந்தியாவில் மையிலான் என்ற ஸ்தலத்தில் உள்ளது” - நெஸ்தோரியர் அமீர்

கி.பி 16

மலபார் கிறிஸ்தவர்கள் சிலர் மெலியாப்போர் கடற்கரையில் உள்ள தாமஸின் கல்லறையைப் பழுது பார்க்கிறார்கள் என்று கொடுங்கல்லூர் தேவாலய ஆயர் ஒரு குறிப்பை எழுதியுள்ளார்.

தாமஸின் கல்லறைக்குள்........

கி.பி 1517ல் கல்லறை திறக்கப் பட்டுள்ளது.

போர்த்துகீஸிய வணிகர்களுடன் வந்த அத்தேசத்துக் கிறிஸ்துவ மத குருமார்கள் கல்லறையை உள்ளூர் அதிகாரிகளின் உதவியுடன் அனுமதியுடன் திறந்துள்ளனர்.

[டியாரகோ ஃபெர்னான்டஸ், பாஸ்தியோ ஃபெர்னான்டஸ் ஆகியோ அக்குருக்கள் ஆவர்]

”தாமஸின் கல்லறை மிகவும் மோசமான நிலையில் உள்ளது.அதை ஒரு உள்ளூர் இஸ்லாமியர் கவனித்துக் கொள்கிறார்.அதில் அவன் விளக்கை ஏற்றி வழிபாட்டுக்கு வைத்தான்.அவன் முன்னோர்கள் அப்படித்தான் செய்தனராம்.கல்லறையை அவன் ”பெத்துமா” [தாமஸின் வீடு] என்றான்..” - ஃபெர்னான்டஸ்

அவ்வூரில் தங்கிய அக்குருமார்கள் கி.பி 1523ல் தான் கல்லறைத் தோண்டினர்.கஸ்ப்பார் கொய்லியோ என்ற போர்த்துகீஸிய தலைமை குரு அதற்குள் மயிலை வந்துள்ளார்.அவர் முன்னிலையில் தான் தாமஸின் கல்லறை திறக்கப்பட்டது.

டைரிக் குறிப்பைக் காண்க....

கல்லறை உடைத்துத் தோண்டினோம்.முதலில் கடல் மணலும் சுண்ணாம்புமும் கலந்து வந்தன. அதன் உள்ளே புனிதரின் கபாலத்தின் உடைந்த எலும்புகள், முதுகெலும்பு ஆகியன இருந்தன. அங்கே பெரிய மண்குடமும் இருந்தது.[அதனுள் அவர் பயன்படுத்திய பொருட்களையும் புனித நூலையும் இட்டு வைத்து இருக்கலாம்.]

மூன்று அடி உயரம் கொண்ட மரப்பிடியுடன் கூடிய ஈட்டி [தாமஸ் கையில் இருந்த ஞானத்தின் அடையாளம்] இருந்தது.அது இருப்பினால் ஆனது.

மேனுவெல் தெ பெரியா என்ற நம் கப்பலின் மாலுமி அவற்றை எல்லாம் அழகிய பெட்டிக்குள் சேகரித்தார்.அப்பெட்டியை அன்று மயிலை முழுவதும் ஊர்வலமாக எடுத்துச் சென்றார்.

கி.பி 1559. விஜய நகர அரசன் தாமஸின் எலும்புகளையும் வேலையும் தன் அரண்மனையில் வைத்து மரியாதை செய்தான்.

அதே ஆண்டில் சில எலும்புகளையும் வேலின் சிறு பகுதியையும் கொச்சினுக்கு அனுப்பினர்.அங்கிருந்து அவை கோவிற்கு அனுப்பப் பட்டன.இன்றும் நிபாந்தரில் உள்ள சர்ச்சில் அவை உள.

கி.பி 1729ல் மீண்டும் தாமஸின் கல்லறை திறக்கப் பட்டது. கல்லறையைச் சுற்றியுள்ள மணல் மந்திரிக்கப்பட்டு மக்களுக்குத் தரப்பட்டு இருக்க வேண்டும்.

ஆனால் இன்று 2016ல் கல்லறை மிகவும் நவீனமயமாக உள்ளது.சின்னமலையிலும் தாமஸ் மலையிலும் கிடைத்த ஜீவாதார உணர்ச்சிப் பெருக்கு இங்கு எமக்கு ஏற்படவில்லை.ஆனால் இன்று பல இடங்களில் அவரது உடலின் பல எலும்புகள் உள்ளன என்று தெரிகின்றது.

என்ன ஆயினும் பாரத தேசத்தின் சனாதன தர்மத்தில் நாம் அனைவரையும் ஏற்றுக் கொள்கிறோம்.மத த்வேஷங்களும் வன்முறைகளும் இருந்துள்ளன.ஆனால் அவற்றை மீறி மக்கள் வேற்றுமையில் ஒற்றுமை கான்கின்றனர்.

இன்று சாந்தோமில் அமைந்திருக்கும் உலகப் புகழ் பெற்ற பெஸிலிகா சர்ச்சில் இன்று காலை ப்ரார்த்தனைகள் மேற்கொண்டேன்.தர்மமும் அஹிம்சையும் கைகூடி நம்மால் இயன்ற சேவைகளை இறைவனின் ஆளுமையின் கீழ் ஆணவமின்றிச் செய்ய அடியேன் தாமஸிடம் வேண்டினேன்.

சென்ற டிசம்பரின் கீழை தேசப்பயணம் என்னுள் பெளத்த சமண ஆய்வுகளை, கற்றலை, புரிதலை, ஏற்றலை ஏற்படுத்தின.

இவ்வாண்டு வேளாங்கண்ணி மாதா மூலம் ஆரம்பித்த இப்பயணம் இன்று ஒரு தேர் நிலை சேர்ந்த வண்ணமாக அமைகிறது.

”தர்மம் மிகு சென்னை” என்று வள்ளல் பெருமான் புகழும் இம்மாநகரம் பற்பல புனித ஸ்தலங்களுடன் கூடிய உன்னத ஆன்மீக அன்பர்தம் ஜீவசமாதிகளையும் கொண்டு இருப்பதால் வளமுடன் உள்ளது!

ஆச்சாரியர்கள், குருமார்கள் மூலமே இறையை உணர்ந்து அருள் பெற முடியும் என்பது தானே உண்மை?! அதைத் தானே அனைத்துச் சமயங்களில் உள்ள ஆன்மீகப் பெரியோரும் உணர்த்துகிறார்கள்?

அதில் ஏசுவின் அருட்தொண்டர் தாமஸின் ஜீவசமாதியும் மயிலையில் அமைந்து நமக்கு அருள் புரிவதை நாம் பயன்படுத்தி உலக க்ஷேமத்திற்காகப் பாடுபடுவோமாகுக!

ஆமென்!

ஓம் ஷாந்தி! ஷாந்தி! ஷாந்தி!

* ஏசு வாழ்ந்த ஸ்தலங்களை எல்லாம் தரிசிக்க வேண்டும் என்ற ப்ரார்த்தனையைத் தாமஸ் அருளட்டும்.

Sakthi Foundation
புனித தாமஸை மதவாதிகள் எதிர்த்தனரா?
புனித தாமஸ் பாரத தேசத்திற்கு வந்து தன் ஆசான் ஏசு கூறிய சத்யப்பொருளின் மூல சாரத்தை உணர்ந்துள்ளார்.தம் தேசத்து மக்களுக்கு ஏசு அதை விளக்கியுள்ளதை எடுத்துக் காட்டியும் இருக்கிறார்.இதை ஏற்றுக் கொண்டவர்கள் நம் மக்கள்.

ஆனால் ப்ரச்சனை எங்கு வந்திருக்கும் தெரியுமோ?
இன்றும் நம் தேசத்தில் பற்பல ஆச்சாரியர்களைப் பின்பற்றுபவர்கள் கண்மூடித் தனமான போக்கில் தம் ஆச்சாரியனை விட மேலோங்கியவரோ இணையானவரோ வேறில்லர் என்று கூறிவிடும் போது சமூஹத்தில் பிற ஜனங்கள் மன சங்கடத்துக்கு ஆளாகி, வெறுக்க ஆரம்பிக்கிறார்கள்.

இதையே தான் தாமஸின் பாரதச் சீடர்கள் செய்திருக்க வேண்டும்.இதன் மூலம் பிற கொள்கைகளையும் ஆசான்களையும் பின்பற்றுவோருக்குத் தாமஸின் ஆன்மீக நெறி மீது வெறுப்பும் பழி வாங்கும் எண்ணமும் மேலோங்கி இருத்தல் வேண்டும்.

அரசியல் சூழலும் இதற்குத் துணை போய் இருத்தல் வேண்டும்.

ஆனால் தாமஸின் கல்லறை என்பது இன்றைய புனித ஜீவசமாதிகளுக்கு நிகரானதே! ஏனெனில் பல மதத்து மக்களும் அதை வணங்கினர், வணங்குகிறார்கள் என்பதே உண்மை.

வேளாங்கண்ணி, நாகூர் தர்கா, ஏர்வாடி, சமயபுரம் ஆகிய ஸ்தலங்கள் சமய வேற்றுமை பாராது மக்களால் இன்றும் வழிபடப் படுவதைக் கருத்தில் கொள்க.

மக்கள் கலியுகத்தில் பொருள், போகம், வ்யாதிகள், இஷ்ட காமர்த்தங்கள் ஆகியவற்றைத் தீர்த்துக் கொள்ளவே பெரும்பாலும் தெய்வத்தை மஹான்களை அண்டுகிறார்கள்.

அதே கதிதான் தாமஸுக்கும்.பல லீலைகள், அற்புதங்கள் மூலம் அன்பர்களை ஆன்மீகப் பாதைக்கு ஆட்கொள்ள மஹான்கள் இருக்க, மக்களோ வெறும் அல்ப ஆசைகளிலேயே மூழ்கி அதை நிறைவேற்ற ஆன்மீகப் பெரியோர்களை அண்டுவது என்று மாறும்?

ஆயிரக்கணக்கில் தாமஸ் மத மாற்றம் செய்து இருந்தார் என்றால் அதைக் கல்வெட்டுகளும் இலக்கியங்களும், குறிப்பாக திராவிட பக்தி இலக்கியங்களும் பதிவு செய்யாமல் போய் இருக்காது! ஏனெனின் உண்மைகளை வரலாற்றில் அதிகம் பூசிமெழுக முடியாது.

உதாரணம்: வள்ளலார், பாம்பன் ஸ்வாமிகள், சாயி பாபா போன்ற பல மஹான்களை அனைவரும் அறிவர்.ஆனால் அவர்களை ஆன்மீக வாழ்வின் ஸ்திடமாகப் பின்பற்றும் குழுக்கள் குறிப்பிட்ட அளவே உண்டு.அதே போல் தாமஸ் போன்ற வெளிதேசத்து ஞானிகளை மக்கள் பார்ப்பது நம் ஊருக்குப் புதியதே அல்ல.காரணம் சமணம், பொளத்தம் ஆகியன வேறு பகுதிகளில் இருந்து வரும் போது அப்பகுதி மக்களை நம்மூர் மக்கள் பார்த்துள்ளனர்.